Te Kaikeri Awarua

I te wā hararei kua hipa nei, tokotoru ngā ākonga e mahi ana i ngā kaupapa rangahau, i runga i ā mātou karahipi ā-raumati.  Kīhai mātou i whakawhāiti i ngā momo kaupapa e wātea ana, ka waiho mā ngā ākonga hei whakatau. I harikoa mātou i te tono a tētahi ringatoi, a Jordan Quinnell; ka riro i a ia tētahi karahipi; e rua ngā whakaahua tino ātaahua nāna i whakaputa.  Tirohia hoki he pitopito korero mō Jordan ki raro iho nei.

Kei roto i tēnei korero e whakaaria nei he whakaahua nā Jordan mō tētahi kaikeri awarua.  Kei a ia te manatā (© copyright).  E whai ana tāna whakamārama [he mea whakamāori].

"I a au e rangahau ana, ka tūpono he pitopito korero i roto i ngā niupepa tawhito i kōrerohia ai he tāngata nō tōku wā kāinga, nō Ōpunake, he tūao (waranatia) e keri ana i ngā awarua. Ko te tino take i puta mai ai te kōrero nei, he nui nō ngā āwangawanga me ngā wawara i tau wā (i te tau 1942) mō ngā Hapanihi me tā rātou takune pea ki te whakaeke mai i Aotearoa nei.  Nā tōna wahapū i whakaraerae ai a Ōpunake.

"He kaupapa rerekē tēnei māku; kīhai i mōhiotia e au i mua.  Engari, ki tōku nei whakaaro he whakatinanatanga pai rawa atu nō āku mahi rangahau, nā te mea, e whakapā ana ki ngā aria e rua, ki te hau kāinga i te wā pakanga, me te tautoko i ngā mahi pakanga.

"I te tīmatanga o tēnei mahi toi āku, ka āhua ngāwari tāku titiro whakamua ki te pikitia e hangaia ai.  Ka pīrangitia kia whakakitea he wāhanga o Ōpunake ki waenganui, ki muri rānei, kia whakaūngia ai ki te wā kāinga, kia anga hoki ki tōku aria.  Ā, kei mua he tangata e keri ana i te awarua.

"I te tīmatanga hoki, ka toko mai te whakaaro kia miramira te āhua “graphic”, kia rite ki ngā pānuitanga tūruhi o mua.  Engari, i a au e mahi ana, ka kikī haere te pikitia; koia anō i mahia ai e au ngā kara ruarua mō te pikitia e kite nei koutou."

Ko wai a Jordan?

Kia ora e te whānau, ko Jordan Quinnell tōku ingoa. He Māori ahau, nō Ngā Ruahine, nō Taranaki, nō Tūwharetoa hoki. E 22 ōku tau, ā, i tērā tau i oti ai i a au te tohu paetahi o Toioho ki Āpiti (Māori Visual Arts) ki Te Papaoiea, ki te Kunenga ki Pūrehuroa (Massey University). Kātahi au ka uru ki roto i te tohu paerunga o Toioho ki Āpiti.

I whānau mai au, ka tipu hoki ki Taranaki, i te tāone pakupaku, ko Ōpunake te ingoa, i te takutai.  E rima āku tau e noho ana ki Te Papaioea, e whakapau kaha ana ki te ako, ki te mahi toi hoki.

Kei te kaingākau au ki ngā tini momo toi.  I tēnei wā tonu, kua aro au ki te hoahoa ā-rorohiko me te tuhi me te tā i ngā pikitia ki te rorohiko.  Ka taea te kī pea, kei te puta tonu mai au hei kaimahi toi.  Kua whakaurua ētahi o āku whakaahua ki roto i ngā whakakitenga toi i te wā kāinga, i Ōpunake, me Ngāmotu; he pikitia e iri ana i roto i te whare toi, ko Kete Aronui te ingoa.  Ka taea ētahi atu mahi toi āku te kite ki te whārangi Kapoata (Instagram), kei @jq_artistry.