Puketapu ki Paraparaumu

Mā ngā kōrero ka mōhio tātou ki te ao whānui, ki te wāhi hoki e noho nei tātou.  Mā ngā kōrero, ka pūmau te tuakiri, ka tukuna te mātauranga me ngā tikanga. Arā, kei te whai mana ēnei tū kōrero. Ki a mātou o Puketapu ki Paraparaumu, kua aro atu ā mātou kōrero ki ō mātou wheako me te Karauna, hei uri o te hunga nōna te whenua.  Nā, kāore e taea ō mātou wheako o mua te panoni, engari, ka taea e mātou te tuhituhi anō ngā kōrero e whakaahuatia nei mātou, ki te tautuhi i tō mātou tuakiri.  Nō mātou tonu tō mātou tuakiri, nā reira, me mau i a mātou ngā kōrero e auahatia nei tō mātou tuakiri.  Koia nei e tūmanako nei ahau, hei kipakipa te mahi rangahau nei kia tīmata ō mātou moemoeā mō ngā momo kōrero, mā mātou e tuku iho ki ā mātou mokopuna, mā rātou hoki e tuku iho ki ā rātou mokopuna.

Nō tōku aroha ki tōku Nan, me tōna aroha ki tōna kuia, ki a Kaiherau Takarua, tōku hononga ki Puketapu.  Anō nei tō te tamaiti tōku ihiihi, e noho ana ki ngā waewae o Nan, e whakarongo ana ki āna kupu i kōrero ai ia mō tōna Nan e mahi muka ana i te awa kei muri i te whare o te whānau, ā, ka mōhio pū ahau kei hea taua wāhi.  Ki tōku nei mahara, he āhua rite pea te rotarota i tito ai au ki ngā waiata i waiata ai a Kaiherau ki tōku Nan, i a rāua e noho ana i te taha o te awa. I tino mataku ahau i te whakaaro ka tito au i te oriori (ko te kaupapa ake tēnei), nā te mea, ehara te reo Māori i tōku reo ūkaipō, engari, i kaha pīrangi au ki te waihanga i tētahi waiata ātaahua i roto i te reo Māori, i te reo Pākehā hoki.  Kōrero ai tōku Nan mō te rapa o tāna reo Māori, me te wero o te kore-mōhio o Kaiherau ki te reo Pākehā, engari, e kōrero ana ia me te menemene me te tino aroha ki tōna kuia.  I pīrangi au ki te tito i tētahi waiata i whakapuakina ai taua aroha, kia maumahara mātou, ahakoa te mamae me ngā mea kua ngaro, mā te aroha ki tō mātou whenua, ki ō mātou tūpuna, ka tuhia anō ngā kōrero i auahatia ai mātou, kia kitea tō mātou pono.

Nō Puketapu ki Paraparaumu, nō Puketapu ki Te Wai o Rongomai ahau, ake tonu atu.  He angitu nō mātou, nō ngā uri o ngā tupuna māia i haere atu ki te rapu whenua, ki te hanga ā-ringa i tō rātou kāinga hou i te kore.  Kei te mōhio mātou, nō tō rātou taenga ki Paraparaumu, kīhai i noho noa rātou, ka tōnui kē ā rātou mahi.  He mea hanga he pā rarahi, he whakatū he māra nunui, ā, tokomaha rawa ngā tāngata i whāngaia.  Tua atu i tō rātou hekenga ki Pararaiha, ka kaha rarau rātou ki te whenua, ka tū toa hoki rātou.  Nā tā mātou whakahōnore i a rātou, ka manatuhia ō rātou whakatāuteute hei wāhanga o ngā wero katoa kua puta mai mō mātou o Paraparaumu ki Puketapu.  Hei uri o ēnei tupuna mīharo, ka tohe tonu mātou kia whakaeatia ngā nawe e tāmia nei mātou, ā, kei te tino pīrangi ahau, ka tū kotahi mātou, pēnei ki ō mātou tupuna i tō rātou hekenga ki runga.  Me whakatika e te Karauna ā rātou hara i mahi ai. Engari, ko tōku tūmanako, ka mahara hoki mātou i pēhea mātou, ko wai mātou, i mua i te whakaekenga mai o te Karauna ki roto i ō mātou koiora, i ō mātou hītori hoki.  Heoi anō, i tō mātou aro i ngā wero maha o waho ināianei, ka pīrangi au kia hono anō mātou ki ō mātou whenua, ki a mātou ake, ki ngā mea katoa hoki e tū nei mātou hei Puketapu ki Paraparaumu.

Whakaahua: nā te kaituhi.

Pānuihia tā Talia Ellison's pūrongo rangahau: https://indd.adobe.com/view/b428a67d-42ad-471d-b298-f3979b3c8a95