He Mahi Wāhine ki te Haukāinga

I te tīmatatanga o te Pākanga Tuarua o te Ao i te tau 1939, 1.6 miriona ngā tāngata tōpū o Aotearoa; e 90,000 ngā tāngata Māori.

I te marama o Māehe, 1943, kotahi hautoru o te iwi Māori e hāpai ana i ngā mahi e pā ana ki te pakanga, hōia mai, kaimahi mai.  Tata ki te 16,000 ngā tāngata kua uru ki roto i ngā ope tauā, ā, i tonoa ngā tini tāngata ki ngā mahi whakahirahira o te motu.

Nā ngā komiti ā-iwi e 315 i whakahaere te māperetanga o ngā tāngata Māori ki roto i ngā ope tauā me ērā atu momo mahi.  I raro aua komiti i te maru o te Māori War Effort Organisation.

Pērā me ngā tāne, i tonoa ngā wāhine ki te mahi.  E kitea nuitia ana ngā wāhine e mahi ana ki ngā hōtēra, ki ngā wheketere, ki ngā tari ā-umanga hoki.  Ka mahi hoki ētahi wāhine Māori ki te Hōhipera o Cornwell i Tāmaki-makau-rau, he mea hanga e te Ope Tauā o Merika; i tonoa kētia ētahi ki te wheketere nui o Watties, i te Matau-o-Māui.  (Tirohia te whakaahua.)

Tua atu i ēnei tū mahi i tonoa ai ngā wāhine, ka whakapau kaha hoki rātou ki te kāinga tautoko ai i ngā mahi e pā ana ki te Pākanga.  Ka whakahaeretia ngā pāmu me ngā māra, tae atu ki ō rātou ake kāinga, ā, ka ngaki hoki rātou kia tū, kia pai ō rātou marae.  I tahuri hoki he wahine nō ngā hāhi ki te āwhina i te hunga kua heke ki ngā tāone, ā, ka tautokona hoki ngā tikanga ā-iwi a ō rātou ake hapori.

Kei te whāia e tā mātou hinonga, e “Te Haukāinga”, kia kimihia he kōrero mō ngā tāngata Māori e noho ana ki Aotearoa nei i te wā o te Pakanga, me ā rātou mahi hei āwhina i ngā tāne e whawhai ana, hei tautoko hoki i ō rātou whānau, i ō rātou hapori, i te motu hoki.

Tēnā koa whakapā mai mehemea kei te pīrangi koe kia tukuna mai ki a mātou he kōrero mō ō koutou whanau me ā rātou mahi i te wā o te Pakanga.